व्हिएस न्यूज – कुलभूषण जाधव यांच्या पत्नीने भेटायला येताना आपल्या बुटांमध्ये हेरगिरी करण्यासाठीची उपकरणे लपविली होती. त्यामुळे त्यांचा बूट जप्त करण्यात आला आणि त्यांना भेटीपूर्वी दुसरे कपडे घालण्यासाठी देण्यात आले, असा कांगावा आता पाकिस्तानने सुरू केला आहे. कुलभूषण जाधव यांच्या कुटुंबीयांना पाकिस्तानने दिलेल्या अपमानास्पद वागणुकीचे तीव्र पडसाद उमटल्यानंतर पाकने सारवासारव करण्यास सुरुवात केली आहे.
पाकिस्तानच्या परराष्ट्र मंत्रालयाचे प्रवक्ते मुहम्मद फैसल यांनी हा कांगावा केला आहे. ‘जाधव यांच्या पत्नीचा बुट सुरक्षेच्या कारणास्तव ताब्यात घेतला होता. त्यांच्या बुटात हेरगिरीसाठीची उपकरणे ठेवली असण्याचा आम्हाला संशय होता. त्यामुळे हे बुट ताब्यात घेतले असून त्याचा तपास सुरू आहे’, असे सांगतानाच ‘जाधव यांच्या पत्नीला दुसरे बुट देण्यात आले होते आणि त्यांना त्यांचे सर्व दागिनेही परत करण्यात आले होते’, असेही त्यांनी सांगितले.
इस्लामाबाद येथे जाधव यांना भेटण्यासाठी त्यांची आई आणि पत्नी सोमवारी आल्या होत्या. ही भेट होण्यापूर्वी पाकिस्तानने त्यांना दुसरे कपडे परिधान करण्यासाठी दिले होते. तसेच त्यांच्या बांगडय़ा, टिकली, मंगळसूत्र, कर्णफुले आणि इतर दागिनेही काढून घेतले होते. ही माहिती बाहेर आल्यानंतर पाकिस्तानविरोधात प्रचंड संतापाच्या प्रतिक्रिया उमटल्या होत्या. त्यामुळे पाकिस्तानने त्यावर पडदा टाकण्यासाठी आता नवा कांगावा केला आहे. दरम्यान, जाधव प्रकरणी परराष्ट्र मंत्री सुषमा स्वराज गुरुवारी संसदेत निवेदन देणार आहेत.