व्हिएस न्यूज - उत्तर प्रदेशात एका मदरशात कोंडून ठेवलेल्या 51 विद्यार्थिनींची पोलिसांनी सुटका केली आहे. तसेच या मदरशाच्या व्यवस्थापकाला अटक करण्यात आली आहे.
लखनऊ येथे यासीनगंज नावाच्या भागात स्थानिक लोकांच्या तक्रारीवरून पोलिसांनी छापा टाकला. त्यावेळी मदरसा जामिया खदीजतुल कुबरा लिलबनात येथून या विद्यार्थिनींची सुटका करण्यात आली, असे उत्तर प्रदेश पुलिस मुख्यालयातील एका प्रवक्त्याने पीटीआय वृत्तसंस्थेला सांगितले. हा मदरसा नोंदणीकृत होता किंवा अनधिकृत चालू होता, याची चौकशी करण्यात येत असल्याचे पोलिसांनी सांगितले.
या मदरशातील वसतिगृहात 51 विद्यार्थिनींना डांबून ठेवले होते. त्यांना कैदेतून सोडवून मोहम्मद तैयब झिया नावाच्या व्यवस्थापकाला अटक केली आहे, असे प्रवक्त्याने सांगितले. हा व्यवस्थापक आमचे शोषण करत होता आणि आमच्याशी अमानुष व्यवहार करत होता, अशी तक्रार या विद्यार्थिनींनी केली आहे. पोलिसांनी या विद्यार्थिनींना त्यांच्या नातेवाईकांपर्यंत पोचविण्याची प्रक्रिया सुरू केली आहे.