व्हीएस न्यूज - प्रभागातील कचरा उचलला जात नसल्याच्या निषेधार्थ पालिकेच्या प्रवेशव्दारावर कचरा टाकून आंदोलन करणाऱ्या राष्ट्रवादी कॉंग्रेसच्या नगरसेविकेच्या विरोधात पिंपरी पोलीस ठाण्यात सोमवारी गुन्हा दाखल करण्यात आला आहे. सत्ताधारी पक्ष विरोधकांचा आवाज दाबण्याचा प्रयत्न करत असून जनतेच्या हितासाठी दहा गुन्हे दाखल झाले तरी हरकत नसल्याचे नगरसेविका पौर्णिमा सोनवणे म्हणाल्या. नगरसेविका पौर्णिमा रवींद्र सोनवणे (वय-42, रा. रूपीनगर), त्यांचे पती रवींद्र आप्पा सोनवणे (वय 46) यांच्यासह 20 कार्यकर्त्यांवर गुन्हा दाखल करण्यात आला आहे. याबाबत महापालिकेचे सहायक सुरक्षा अधिकारी विलास बाबासाहेब वाबळे (वय-55) यांनी पिंपरी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, नगरसेविका सोनवणे व त्यांच्या 15 ते 20 कार्यकर्त्यांनी शुक्रवारी कोणतीही परवानगी न घेता पालिकेच्या प्रवेशव्दारावर कचरा टाकत गोंधळ घातला. यामुळे परिसरात घाणीचे साम्राज्य निर्माण सर्वत्र दुर्गंधी पसरली. पालिकेच्या दैनंदिन कामकाजात अडथळा निर्माण केल्याचे फिर्यादीत म्हटले आहे.
दरम्यान, सोनवणे या प्रभाग क्रमांक 12 रुपीनगर, त्रिवेणीनगरमधून निवडून आल्या आहेत. या परिसरातील आणि सोसाट्यांमधील कचरा गेल्या काही दिवसांपासून उचलला जात नव्हता. परिसरात जागो-जागी कचऱ्याचे ढीगच्या-ढीग तर सोसाट्यांमध्ये देखील कचऱ्याचे ढीग साचले होते. सर्वत्र कचऱ्याच्या ढिगांमुळे दुर्गंधी पसरली होती. नागरिकांचे आरोग्य धोक्यात आल्याने संतप्त झालेल्या नगरसेविका सोनवणे आणि त्यांच्या कार्यकर्त्यांने प्रवेशद्वारासमोर टाकला होता.
समस्या मांडली म्हणून गुन्हे दाखल करणे चुकीचे
पिंपरी-चिंचवड महापालिका स्वच्छ सर्वेक्षणात पहिल्या क्रमाकांवर येण्यासाठी प्रयत्न करत आहे तर दुसरीकडे प्रभागातील कचरा उचल्याण्यासाठी नगरसेवकांना आंदोलन करावे लागत आहे. निष्क्रिय प्रशासान प्रश्न मार्गी लावयाचे सोडून आंदोलन करणाऱ्या नगरसेवकांवर, करदात्या नागरिकांवर गुन्हे दाखल करत आहे. यावर नागरिकांमधून तीव्र संताप व्यक्त केला जात आहे.