व्हीएस न्यूज- पश्चिम रेल्वेवर नव्यानेच सुरू झालेल्या वातानुकूलित (एसी) लोकलमध्ये सध्याच्या लोकलप्रमाणे पहिल्या आणि दुस-या श्रेणीचे डबे देण्याची सूचना रेल्वेमंत्री पीयूष गोयल यांनी केली आहे. एसी लोकलमधील प्रवाशांची संख्या कमी असल्याने त्यात वाढ करण्यासाठी नवनवीन उपाय सुचविले जात आहेत. त्याचप्रमाणे एसीचे दरही प्रवाशांना परवडण्यासारखे असावेत, अशीही मुख्य सूचना पुढे आली आहे.
एसी लोकल विरापर्यंत विस्तारित केल्यानंतर त्याला चांगला प्रतिसाद मिळेल, असा दावा केला जात होता. मात्र एसी लोकलमधील प्रवाशांची संख्या अल्प असल्याचे आढळून आले आहे. या पार्श्वभूमीवर गोयल यांनी एसी लोकलमधील प्रवाशांची संख्या वाढविण्यासाठी तसेच जास्तीत जास्त प्रवाशांना आरामदायी प्रवास करता यावा, यासाठी दरांमधील बदलांवरही भर दिला आहे. गोयल यांनी मुख्यमंत्री देवेंद्र फडवणीस यांच्याशी विविध रेल्वे प्रकल्पांबाबत शुक्रवारी चर्चा केली.
त्यापूर्वी मध्य, पश्चिम रेल्वेसह मुंबई रेल्वे विकास महामंडळाच्या (एमआरव्हीसी) अधिका-यांशीही त्यांनी संवाद साधला. त्यावेळी लोकलमध्ये एसीचा डबा उपलब्ध करण्याचा पर्यायही विचारात घ्यावा, अशी सूचनाही केली. पश्चिम रेल्वेने एसी लोकलविषयी प्रवाशांची मते मागवून घेण्याचा निर्णय घेतला आहे. त्यासाठी प्रवासी पश्चिम रेल्वेच्या संकेतस्थळावर((http://www.wr.indianrailway.gov.in) वा सबमिट लिंकच्या आधारे सूचना करू शकतात. त्यासाठी प्रवाशांना नाव, इमेल, संपर्क, सूचना आदी माहिती द्यायची आहे.