कांदिवली पूर्व येथील समतानगर परिसरात राहणारा अनिल वाघमारे हा माहिती अधिकार कार्यकर्ता असून तो स्पर्धा परीक्षा मार्गदर्शन वर्गही चालवितो. माहिती अधिकारातून मिळालेल्या माहितीचा तो गैरवापरही करीत असे. अशा काही माहितीच्या आधारे आर्थिक फायदा होणे अपेक्षित असणा-या ठिकाणी सावंत यांनी त्याला विरोध केला होता. आपला आर्थिक तोटा होत असल्याचा राग वाघमारेला होता. तसेच, वाघमारेकडून काही ठिकाणी हस्तक्षेप करण्याचा प्रयत्न झाला असता सावंत यांनी त्याला विरोध केला होता. सावंत यांच्यामुळे आर्थिक नुकसान होत असल्याचा राग वाघमारे याच्या मनात खदखदत होता.
सावंत यांच्यासोबत असणा-या जगदीश पवार या अन्य आरोपीलाही पैशांची गरज होती. सावंत यांनी त्याला बाजूला केले होते. केबल व्यवसायात असणा-या सावंत यांच्याकडे हजार-दीड हजार केबल्स होत्या. या केबल व्यवसायात सहभागी करावे, असा पवार याने सावंत यांच्याजवळ आग्रह धरला होता. मात्र सावंत यांनी त्याला नकार दिल्याने पवारच्या मनात राग धुमसत होता. यातून या दोघांनी एकत्र येत हा कट रचला, असे पोलिसांनी सांगितले.
सावंत यांच्या हत्येत सहभागी असलेल्या पुण्यातील अल्पवयीन तरुणाचे गुन्हेगारी जगतात नाव कमावण्याचे स्वप्न आहे. पुण्यात राहणारा हा तरुण चरसी म्हणूनच कुख्यात असून तीन ते चार महिन्यांपासून तो या हत्येचा कट रचणा-या टोळीशी जवळीक साधून होता. घरची स्थिती सामान्य असलेल्या या तरुणाला जगदीश पवार आणि साथीदारांनी हेरले होते. अल्पवयीन असल्याने तुला फारसा त्रास होणार नाही, मग तू मोठा गँगस्टर होशील, अशी फूस त्याला लावली होती. सावंत यांच्या हत्येनंतर या अल्पवयीन आरोपीने दुस-या दिवशी नेहमीप्रमाणे महाविद्यालयातील वर्गात हजेरी लावल्याचेही समोर आले आहे. त्याची रवानगी सध्या बालसुधारगृहात झाली आहे.