ईडीच्या मालकीच्या जागेवर बेकायदेशीर गृहप्रकल्प बांधून फ्लॅट विकले

याबाबत सक्त वसुली विभागाचे अधिकारी धनशिलन दामोदरन नायर (वय-45, रा. डोंबिवली) यांनी हिंजवडी पोलीस ठाण्यात फिर्याद दिली आहे. सय्यद मोहम्मद मसुद, साजीद इब्राहिम वारेकर, गुड्डू शेख, प्रवीण रामचंद्र गुरव, साहिल रिऍल्टर्स, हिंदवी स्वराज्य ट्रेडींग प्रा. लि., दुय्यम निबंधक कार्यालय मुळशी-2, दुय्यम निबंधक कार्यालय पौड यांच्यावर फसवणुकीचा दाखल करण्यात आला आहे. हिंजवडी पोलिसांनी दिलेल्या माहितीनुसार, सक्त वसुली विभागाने (ईडी) 15 जुलै 2013 मध्ये सर्व्हे नंबर 220 हिस्सा क्रमांक 1 व 5/5 ता. मुळशी येथे 83 आर ही मिळकत जप्त केली. हे माहिती असूनसुद्धा सय्यद मसूद याने ती जमीन साजिद इब्राहिम वारेकर, गुड्डू शेख, प्रवीण रामचंद्र गुरव, साहिल रिऍल्टर्स, हिंदवी स्वराज्य ट्रेडींग प्रा.लि. यांना विकली. यासाठी दुय्यम निबंधकाशी संगनमत केले. दोनवेळा या जमिनीची निबंधक कार्यालयाच्या रजिस्टरवर नोंद केली. ही जमीन सक्त वसुली विभागाची असल्याची माहिती असून सुद्धा हिंदवी स्वराज्य ट्रेडींग प्रा.लि. चे संचालक प्रवीण गुरव यांनी तेथे उत्कर्ष हा गृहप्रकल्प बांधला. या प्रकल्पातील फ्लॅट हिंजवडी येथे सॉफ्टवेअर कंपनीत काम करणाऱ्या अभियंत्यानी विकत घेतले आहे. त्यामुळे या अभियंत्याचीही फसवणूक झाली आहे. या प्रकरणाचा तपास चतुःश्रृंगी विभागाचे सहायक पोलीस आयुक्त विक्रम पाटील करीत आहेत.