व्हीएस न्यूज - भगतसिंह यांना पाकिस्तानातील सर्वोच्च शौर्य पुरस्कार ‘निशान-ए-हैदर’ द्यावा आणि त्यांचा पुतळा लाहोरच्या शादमन चौकात स्थापित करण्यात यावा, अशी मागणी पाकिस्तानातील एका संस्थेने केली आहे. भगतसिंग यांनी भारतीय उपखंड मुक्त करण्यासाठी आपले प्राण अर्पण केले होते आणि ते या पुरस्कारासाठी पात्र आहेत, असे संस्थेने म्हटले आहे.
भगतसिंग मेमोरियल फाऊंडेशन असे या संस्थेचे नाव असून न्यायालयात भगतसिंग यांचे निर्दोषत्व सिद्ध करण्यासाठी ही संस्था काम करते. सरकारच्या विरूद्ध कट रचणे आणि ब्रिटिश पोलिस अधिकारी जॉन पी. साँडर्स याला मारण्याच्या आरोपावरून भगतसिंग यांच्यावर राजगुरू व सुखदेव यांच्यासह खटला चालवण्यात आला होता. त्यानंतर त्यांच्या सहकाऱ्यांसोबत ब्रिटीश शासनाने 23 मार्च 1931 रोजी लाहोरमध्ये फाशी दिली होती.
पाकिस्तानच्या पंजाब प्रांत शासनाला संस्थेने या संबंधात नव्याने अर्ज दिला आहे. त्यात म्हटले आहे, की “भगतसिंह यांच्यासारखा शूर व्यक्ती उपखंडात कोणीही झाला नाही, अशा शब्दांत पाकिस्तानचे संस्थापक कैद-ए-आझम मोहम्मद अली जिन्ना यांनी या स्वातंत्र्यसैनिकांना श्रद्धांजली अर्पण केली होती.” “भगतसिंह हे आमचे नायक आहेत आणि महान पराक्रमी मेजर अझीझ भट्टी यांच्या प्रमाणेच त्यांनाही निशान-ए-हैदर द्यावा,” असे संस्थेने म्हटल्याचे पीटीआय वृत्तसंस्थेने म्हटले आहे. फाउंडेशनने शादमन चौकाला भगतसिंग यांचे नाव देण्याचीही पुन्हा मागणी केली आहे.