स्व. लोकनेते गोपीनाथ मुंडे यांच्या 68 व्या जयंती निमित्त शनिवारी (दि. 3 फेब्रुवारी) रहाटणी येथे लोकनेते गोपीनाथ मुंडे जयंती समितीच्या वतीने ‘आठवणीतले मुंडे साहेब’या कार्यक्रमात पंकजा मुंडे बोलत होत्या. यावेळी पुण्याच्या महापौर मुक्ता टिळक, पिंपरी चिंचवडचे महापौर नितीन काळजे, आळंदीच्या नगराध्यक्षा वैजयंता उमरगेकर, पायलट रमीला लटपटे, विजय वडमारे, अंजिक्य गायकवाड यांचा पंकजा मुंडे यांच्या हस्ते सत्कार करण्यात आला. व्यासपिठावर खासदार अमर साबळे, डॉ. अमित पालवे, लोकलेखा समितीचे अध्यक्ष ॲड. सचिन पटवर्धन, संघटन मंत्री सुनिल कर्जतकर, आमदार महेश लांडगे, ज्येष्ठ नेते आझमभाई पानसरे, भाजपा प्रदेश सचिव उमा खापरे, प्रदेश सदस्य सदाशिव खाडे, माजी आमदार गोविंद केंद्रे, स्थायी समिती अध्यक्षा सीमा सावळे, उपमहापौर शैलजा मोरे, पीएमआरडीएचे आयुक्त किरण गिते आदींसह बहुतांश नगरसेवक, नगरसेविका उपस्थित होते.
मुंडे म्हणाल्या की, स्व. लोकनेते गोपीनाथ मुंडे यांनी आपल्या मागे असणा-या सर्मथकांना बरोबर घेऊन नगरसेवक, आमदार, खासदार होण्याची संधी दिली. त्यांच्या विषयी बोलताना अश्रू येऊ न देता फक्तं भावना व्यक्तं करायच्या याचं धाडस मला त्यांच्यामुळेच आले. त्यांनी भावनेचे राजकारण केले नाही तर, जे केले ते भावनेने केले म्हणून देशभर त्यांच्या जयंतीचे कार्यक्रम लोक घेत आहेत. त्यांची सदैव आठवण त्यांच्या मित्रांना नेहमी येतेच परंतू त्यांच्या शत्रूंना देखील त्यांची आठवण येते असे त्यांनी अजातशत्रू बनविले. सकारात्मक स्वभावामुळेच ते यशस्वी झाले. भाजपाने त्यांच्यावर अन्याय केला असे म्हणणा-यांना त्यांच्या मागचा वर्ग आपलासा करण्याचा केविलवाणा प्रयत्न असल्याचे मुंडे म्हणाल्या. प्रमोद महाजन आणि गोपीनाथ मुंडे यांचे मैत्रीपुर्ण नातेसंबंध तसेच विलासराव देशमुख यांच्या बरोबरच्या त्यांच्या आठवणी यावेळी पंकजा मुंडे यांनी सांगितल्या. मुंडे साहेबांमुळेच मला अटल बिहारी वाजपेयी, लालकृष्ण अडवाणी, राजनाथ सिंह, सुंदरलालजी पटवा यांच्याबरोबर राहून शिकण्याची संधी मिळाली. त्यांच्याबरोबर अधिवेशनाला उपस्थित राहून, कार्यकर्त्यांच्या घरी पिठलं भाकरी खाऊन मी घडले. माझ्या मुलीने मला निवडून आणले हे ते अभिमानाने राज्यभर सांगायचे. मुले- मुली असा भेदभाव त्यांनी केला नाही. बारामतीत मी जेंव्हा युवा मोर्चाची एल्गार सभा घेतली तेंव्हा ती पाहण्यासाठी ते टिव्ही पुढे बसले, आणि सभेला झालेली गर्दी पाहून माझे भाषण संपताच त्यांनी मला फोन करुन अभिनंदन केले. तरुणांना संधी देण्याचे त्यांचे धोरण होते. अशा अनेक आठवणी पंकजा मुंडे यांनी सांगितल्या.
खासदार अमर साबळे म्हणाले की, स्व. गोपीनाथ मुंडे माझ्या जीवनात आले नसते तर मी खासदार झालो नसतो. दिल्लीत देखिल माझी ओळख गोपीनाथ मुंडेचा माणूस म्हणूनच आहे. सत्ता असू नाही तर नसू दिनदुबळ्यांचे अश्रू पुसण्याचे काम त्यांनी केले.
संयोजनात सदाशिव खाडे, आबा नागरगोजे, रघूनंदन घुले, अरुण पवार, सुभाष गराडे, केशव घोळवे, बाबू नायर, गणेश ढाकणे, सुभाष पालवे, माऊली थोरात, चंद्रकांत नखाते, बाबा त्रिभूवन, दिपक जाधव, श्रीनिवास नढे, अशोक सोनवणे आदींसह शेकडो कार्यकर्त्यांनी परिश्रम घेतले. या कार्यक्रमाचे आयोजन भगवान सेना पिंपरी चिंचवड, बीड जिल्हा मित्र मंडळ, राष्ट्र संत भगवान बाबा प्रतिष्ठान पुणे, जय भगवान युवा फाऊंडेशन, ब्रम्हचैतन्य फाऊंडेशन, मराठवाडा जनविकास संघ, मराठवाडा मित्र मंडळ, भगवान बाबा मित्रमंडळ, जय भगवान महासंघ, लोकनेते गोपीनाथराव मुंडे प्रतिष्ठान व लोकनेते गोपीनाथ मुंडे विचारमंच पिंपरी चिंचवड आदी संस्थांनी केले होते.
स्वागत, प्रास्ताविक सदाशिव खाडे, आभार मोरेश्वर शेडगे यांनी मानले.