रस्त्यावर डिझेल सांडल्याने दुचाकी घसरून नागरिक जखमी

व्हीएस न्यूज - येथील शहीद भगतसिंग चौक ते राजमाता गार्डन दरम्यान रस्त्यावर डिझेल सांडल्यामुळे तब्बल 30 ते 40 दुचाकी घसरून पडल्याने अनेकजण जखमी झाले. हा प्रकार सकाळी अकराच्या सुमारास घडला. सकाळची वेळ असल्याने अनेकजण कामावर, तसेच लहान मुलांची शाळा सुटल्याने अनेकजण मुलांना शाळेतून घरी घेऊन जात होते. नेमके या वेळेत रस्त्यावर अज्ञात वाहनातून डिझेल गळती होऊन रस्ता निसरडा झाल्याने अनेक दुचाकी स्लिप होऊन पडत होत्या. दरम्यान, रस्त्यावर डिझेल सांडून अपघात होत असल्याचे समजताच सामाजिक कार्यकर्ते राहुल जवळकर यांनी अग्निशमन दलाला याबाबतची माहिती दिली. तोपर्यंत राहुल जवळकर यांनी दीपक काशिद, आशिष जाधव, राजू काशिद, संतोष काशिद, नवनाथ भिडे व भैरवनाथ मित्र मंडळ, गणेश तरुण मंडळ या कार्यकर्त्यांच्या साहायाने घटनास्थळी माती टाकून रस्ता कोरडा केला. अल्पावधीतच अग्निशमन दलाचे जवान हजर झाले आणि डिझेलयुक्त रस्ता पाण्याने धुवून काढला.