कार्यालयात घुसून पिस्तुलाच्या धाकाने साडेचार लाखाचा ऐवज लुटला

दिलीप धर्माजी वाल्हेकर (वय 57, रा. वाल्हेकरवाडी, चिंचवड) यांनी चिंचवड पोलीस ठाण्यात फिर्याद दिली आहे. पोलीस निरीक्षक विनायक साळूंखे यांनी याबाबत माहिती दिली. वाल्हेकर यांची शिवम कॉम्प्लेक्स येथे मोठी चाळ आहे. या चाळीत त्यांचे कार्यालय आहे. वाल्हेकर हे शनिवारी दुपारी नेहमीप्रमाणे त्यांच्या कार्यालयात बसले होते. एकच्या सुमारास तोंडाला रूमाल बांधलेले दोन जण कार्यालयात आले. वाल्हेकर यांना कोयता आणि पिस्तुलाचा धाक दाखवत त्यांच्याकडील सोन्याचे दागिने, मोबाईल आणि 12 हजाराची रोकड असा 4 लाख 40 हजार रूपये किमतीचा ऐवज जबरदस्तीने काढून घेतला. त्यानंतर त्यांना शौचालयात कोंडून बाहेरून कडी लावून चोरटे पसार झाले. वाल्हेकर यांनी आरडा-ओरडा केल्यानंतर आजुबाजूच्या नागरिकांनी त्यांची सुटका केली. चोरटे नेमके कोणत्या वाहनातून आले, हे समजू शकले नाही. चिंचवड पोलीस तपास करत आहेत.