सहाय्यक परिवहन अधिकाऱ्याला बघून घेण्याची एजंटकडून धमकी  

व्हीएस न्यूज - इसमाचे लायसन त्वरीत काढून देण्याची मागणी करत एका एजंटने पिंपरी-चिंचवड उपप्रादेशिक परिवहन कार्यालयातील सहाय्यक परिवहन अधिकाऱ्याला शिवीगाळ करत धक्काबुक्की केली. तसेच मी कोण आहे, तुला माहित आहे ना, तुझ्याकडे बघून घेतो, अशी धमकी दिल्याचा धक्कादायक प्रकार गुरूवारी सायंकाळी सव्वा पाचच्या सुमारास मोशी येथील आरटीओ कार्यालयात घडला.
गौतम सुराडकर असे आरोपी एजंटचे नाव आहे. याप्रकरणी पिंपरी-चिंचवड उपप्रादेशिक परिवहन कार्यालयातील सहाय्यक परिवहन अधिकारी सुबोध मेडसीकर (वय-55, रा. सेनापती बापट रोड, पुणे) यांनी भोसरी, एमआयडीसी पोलीस ठाण्यात फिर्याद दिली आहे.
याबाबत फौजदार ईश्वर जगदाळे यांनी माहिती दिली. फिर्यादी हे पिंपरी-चिंचवड उपप्रादेशिक परिवहन कार्यालयात सहाय्यक परिवहन अधिकारी म्हणून कार्यरत आहेत. गुरूवारी सायंकाळी आरोपी व इतर एक जण त्यांच्या केबीनमध्ये आले. माझ्या माणसाचे लायसन त्वरीत काढून देण्याची मागणी आरोपीने केली. फिर्यादी यांनी आरोपीला केबीनच्या बाहेर जाण्यास सांगितले. यावरून चिडलेल्या आरोपी एजंटने फिर्यादी यांना शिवीगाळ करत धक्काबुक्की केली. तसेच मी कोण आहे, तुला माहित आहे ना, तुझ्याकडे बघून घेतो, अशी धमकी दिली. सरकारी कामात अडथळा आणल्याप्रकरणी आरोपी एजंटवर गुन्हा दाखल करण्यात आला आहे. एमआयडीसी पोलीस अधिक तपास करत आहेत.