.jpg)
व्हीएस न्यूज - बसस्टॉपकडे पायी चालत जाणाऱ्या व्यक्तीला दुचाकीवरून आलेल्या तिघांनी जमिनीवर खाली पाडून त्याच्याकडील रोख रक्कम आणि मोबाईल हिसकावून नेला. मंगळवारी रात्री साडेअकराच्या सुमारास काळेवाडी फाट्यावर ही घटना घडली असून यातील दोघा आरोपींना वाकड पोलिसांनी बेड्या ठोकल्या आहेत.
मुकेश परिहार (वय-30 , रा. थेरगाव), असे लुबाडणूक झालेल्या व्यक्तीचे नाव आहे. याप्रकरणी ऋषिकेश महादेव चव्हाण (वय 20, रा. ज्ञानदीप कॉलनी, थेरगाव), गोविंद संताराम तुप (वय 21, रा. पानसरे कॉलनी, पडवळनगर, थेरगाव) आणि ऋत्विक शेलार यांच्या विरूद्ध गुन्हा दाखल करण्यात आला आहे. यातील चव्हाण आणि तुप या दोघा आरोपींना अटक करण्यात आली आहे. मुकेश मंगळवारी रात्री साडेअकराच्या सुमारास काळेवाडी फाट्यावरील पीएमपीएलच्या बसस्टॉपकडे पायी चालत जात होता.
त्यावेळी दुचाकीवरून आलेल्या तिघा आरोपींपैकी एकाने धक्का देवून मुकेशला जमीनीवर पाडले. त्यानंतर त्याच्या पॅंटच्या पाठीमागील खिशाच्या पाकीटात असलेली 15 हजाराची रोख रोकड आणि 1 हजार रुपये किमतीचा एक मोबाईल हॅंडसेट जबरदस्तीने घेवून पोबारा केला. आरोपी पळून जात असताना त्यांची दुचाकी घसरली. त्यामुळे जखमी अवस्थेतील दोन आरोपी पोलिसांच्या जाळ्यात सापडले, तर एकजण फरार झाला. पोलिस उपनिरीक्षक रमेश केगार तपास करीत आहेत.