व्हीएस न्यूज - संत निरंकारी चॅरिटेबल फाऊंडेशनच्या वतीने काळेवाडीत आयोजित रक्तदान शिबिराला उस्फुर्त प्रतिसाद मिळाला. या शिबिरात 819 रक्तदात्यांनी रक्तदान केले. यामध्ये महिला मोठ्या संख्येने सहभागी झाल्या होत्या.
काळेवाडीतील संत निरंकारी सत्संग भवन येथे आयोजित रक्तदान शिबीराचे उद्घाटन पुणे झोनचे प्रमुख ताराचंद करमचंदानी यांच्या हस्ते झाले. यावेळी नगरसेवक राहुल कलाटे, अभिषेक बारणे, गोपाळ मलेकर, डब्बू आसवानी, नगरसेविका उषा काळे, कृष्णा बुचडे आदी उपस्थित होते. निरंकारी चॅरिटेबल फाऊंडेशनचे स्वयंसेवक, तसेच सेवादल, साधसंगत मोठ्या संख्येने उपस्थित होते.
रक्त संकलनाचे कार्य वाय. सी. एम. हॉस्पिटल रक्तपेढी, ससून हॉस्पिटल रक्तपेढी, कमांड हॉस्पिटल रक्तपेढी यांनी केले. रक्तदान शिबिराच्या पूर्वतयारीसाठी संत निरंकारी चॅरिटेबल फाऊंडेशनच्या माध्यमातून रक्तदान जनजागृती मोहीम आखण्यात आली होती. यामध्ये पिंपरी, चिंचवड, काळेवाडी, पिंपळे सौदागर या ठिकाणी जाऊन पथनाट्य, दुचाकी फेरी, पदयात्रा या कार्यक्रमाच्या माध्यमातून रक्तदान करण्याविषयी जनजागृती करण्यात आली. तसेच घरा-घरामध्ये जाऊन रक्तदानाची प्रेरणा देण्यात आली. संत निरंकारी मंडळाचे पिंपरीचे प्रमुख गिरिधारी मतनानी यांनी सर्वांचे आभार मानले.