भाजप नेते गोहर अहमद यांची दहशतवाद्यांकडून हत्या

व्हीएस न्यूज - जम्मू काश्मीरमधील शोपिया येथील भाजयुमोचे नेते गोहर अहमद यांची घरातून अपहरण करून हत्या करण्यात आली. ही घटना गुरूवारी संध्याकाळी सहाच्या सुमारास घडली. गोहर अहमद यांचा मृतदेह त्यांच्या घरापासून ६ किमी दूर असलेल्या एका बागेत आढळून आला. अहमद यांच्या अंत्यसंस्कारावेळी मोठी गर्दी उसळली होती. भाजप अध्यक्ष अमित शहा यांनी ट्विट करत त्यांच्या मृत्यूवर दु:ख व्यक्त केले आहे. काश्मीर खोऱ्यातील युवकांना चांगले भविष्य निवडण्यापासून रोखण्याचा दहशतवाद्यांचा उद्देश यशस्वी होणार नाही, असे त्यांनी आपल्या ट्विटमध्ये म्हटले आहे. भाजप अहमद यांच्या कुटुंबाबरोबर उभे आहे, असेही त्यांनी म्हटले. जम्मू-काश्मीरमध्ये दहशतवाद्यांकडून गळा चिरून हत्या करण्याचे हे दुसरे प्रकरण आहे. यापूर्वी एजाज अहमद यांची गळा चिरून हत्या करण्यात आली होती. एजाज अहमद हा एक काश्मिरी युवक होता. तो भारतीय सैन्यात होता.