व्हीएस न्यूज - भ्रष्टाचाराला आळा न घातल्यास चीनदेखील सोव्हिएत संघासारखा उद्ध्वस्त होईल, असा घरचा आहेर चीन सरकारमधील एका वरिष्ठ अधिकाऱ्याने दिला आहे. देशातील भ्रष्टाचाराचे प्रमाण कमी न झाल्यास चीनचेही सोव्हिएत संघासारखे तुकडे पडतील, असा इशारा सत्ताधारी कम्युनिस्ट पक्षाच्या पॉलिट ब्युरोचे सदस्य यांग शिआओडू यांनी दिला. विशेष म्हणजे शिआओडू चीन सरकारच्या भ्रष्टाचारविरोधी मोहिमेशी संबंधित अधिकारी आहेत.
‘भ्रष्टाचारविरोधी अभियानात अयशस्वी ठरणे चीनसाठी घातक असेल,’ असा धोक्याचा इशारा शिआओडू यांनी दिला. शिआओडू यांना केंद्रीय शिस्तपालन आयोगाच्या उपसचिव पदावरुन पॉलिट ब्युरोच्या सदस्यपदी बढती देण्यात आली आहे. त्यामुळे भ्रष्टाचारविरोधी अभियानातील अधिकाऱ्यांच्या यादीत ते आता दुसऱ्या क्रमांकावर आहेत. चीन सरकारवर पॉलिट ब्युरोचे संपूर्ण नियंत्रण असते. त्यामुळे शिआओडू यांच्या विधानाला महत्त्व आहे.
शिआओडू यांनी आधीच्या सरकावर जोरदार टीका केली आहे. ‘आधीच्या सरकारच्या काळात भ्रष्टाचारात मोठी वाढ झाली होती. त्यावेळी सत्ताधारी पक्षाचे नेतृत्त्व भ्रष्टाचाराला आळा घालण्यात कमी पडले. त्या काळात भ्रष्टाचाराच्या प्रकरणांकडे कोणाचेही लक्ष नव्हते. भ्रष्टाचाराला खतपाणी घालण्याचे काम आधीच्या सरकारने केले. त्यावेळी भ्रष्टाचाराच्या विरोधात ठोस भूमिका घेण्यात आली नाही. त्यामुळे दोषींवर कोणती कारवाईदेखील झाली नाही,’ असे शिआओडू यांनी म्हटले.
भ्रष्टाचाराच्या वाढत्या प्रमाणावर शिआओडू यांनी चीनचे सरकारी वृत्तपत्र असलेल्या पीपल्स डेलीमध्ये संपादकीय लेख लिहिला आहे. ‘भ्रष्टाचाराला आळा न घातल्यास त्यामुळे संपूर्ण चीनचे स्वरुपच बदलेल. भ्रष्टाचारामुळे चीन उद्ध्वस्त होईल. लवकरात लवकर भ्रष्टाचारावर नियंत्रण न मिळवल्यास चीनची अवस्थाही सोव्हिएत युनियनसारखी होईल. चीनचे तुकडे पडतील,’ असे शिआओडू यांनी लेखात नमूद केले आहे. १९९० मध्ये सोव्हिएत रशियाचे तुकडे झाले होते.