सत्तेत संविधानात बदल करण्यासाठीच आलो आहोत – भाजप नेते
बंगळुरू
2017-12-26
व्हिएस न्युज – आपल्या वक्तव्याने पुन्हा एकदा वाद ओढवून घेत केंद्रीय मंत्री व भाजप नेते अनंत कुमार हेगडे यांनी भाजपलाच अडचणीत आणले आहे. संविधानात वेळोवळी बदल झाले आहेत आणि असे बदल आम्ही सुद्धा करणार असून आम्ही त्यासाठीच सत्तेवर आलो आहोत, असे वादग्रस्त वक्तव्य हेगडे यांनी केले आहे.
धर्मनिरपेक्ष म्हणून मिरवणाऱ्यांना स्वतःचे मूळ माहिती नाही. त्यांना संविधानानेच धर्मनिरपेक्ष म्हणवण्याचा अधिकार बहाल केला आहे. पण, वारंवार याच संविधानात बदल करण्यात आले आहेत आणि आम्हीही आता असे बदल करू हे त्यांनी लक्षात ठेवावे. अनंत कुमार हेगडे कोप्पल जिल्ह्यातील कुकानूर शहरात ब्राह्मण युवा परिषदेने आयोजित केलेल्या एका कार्यक्रमात बोलत होते.
पुढे ते म्हणाले, एखादा व्यक्ती जर स्वतःला मुस्लिम, हिंदू, ख्रिस्ती, बौद्ध म्हणवून घेत असेल तर त्याचा मला अभिमान वाटेल. कारण त्याची त्याच्या धर्माशी आणि जातीशी बांधिलकी आहे. परंतु, स्वतःला धर्मनिरपेक्ष म्हणवणारे कोण आहेत? त्यांना स्वतःचे मूळही ठाऊक नाही. वादग्रस्त वक्तव्यांसाठी पाच वेळा लोकसभेवर निवडून आलेले अनंत कुमार हेगडे हे ओळखले जातात. कर्नाटकचे मुख्यमंत्री सिद्धरामय्या यांच्याबद्दल अपमानकारक वक्तव्य केल्याबद्दल त्यांच्यावर गुन्हा दाखल करण्यात आला होता.
.jpeg)
~2.jpg)
