आर्थिक वादातून हत्या.

व्हीएस न्यूज - दौंड येथे आर्थिक वादातून भारतीय राखीव दलाच्या साहाय्यक उपनिरीक्षकाने रागाच्या भरात सर्व्हिस रिव्हॉल्वरमधून तिघांवर गोळीबार करून खून केल्याचा धक्कादायक प्रकार मंगळवारी दुपारी घडला. तिघांचा खून केल्यानंतर पोलिस शस्त्रासह त्याच्या घरात लपून बसल्यामुळे जमाव व पोलिसांचे पथक बराच काळ घराला वेढा देऊन बसले होते; पण उपनिरीक्षक नगरच्या दिशेने पसार झाला. अखेर सुपा पोलिसांनी त्याला पकडल्यानंतर सर्वांनी सुटकेचा निश्वास टाकला.

या घटनेनंतर दौंड शहरात तणावाचे वातावरण होते. त्याने आर्थिक वादातून व पूर्ववैमनस्यातून तिघांना गोळ्या घातल्याचे समोर आले आहे. संजय बी. शिंदे (वय ३३ रा. अथर्व अपार्टमेंट, गोपाळवाडी रोड, दौंड ) असे अटक केलेल्या पोलिसाचे नाव आहे. या घटनेत परशुराम गुरुनाथ पवार (वय ३३), गोपाळ काळुराम शिंदे (वय ३५) (दोघेही राहणार वडारगल्ली, दौंड), अनिल जाधव (वय ३०, रा बोरावकेनगर, दौंड ) यांचा गोळीबारात मृत्यू झाला आहे. पोलिसांनी दिलेल्या माहितीनुसार, शिंदे हा भारती राखीव दलाच्या कोल्हापूर युनिटचा असून, तो सध्या दौंड येथे क्रमांक सातच्या बटालियनमध्ये नेमणुकीला होता. त्याला जुगाराचे व्यसन होते. तो एकाला पैसे देणेही लागत होता, तर गोपाळकडून त्याला दहा हजार रुपये येणे होते. मंगळवारी दुपारी शिंदे हा दौंड शहराच्या नगर मोरी परिसरात गोपाळकडे पैशाची मागणी करण्यासाठी गेला. त्या वेळी त्याची गोपाळशी वादावादी झाली. त्यातून त्याने गोपाळवर गोळीबार केला. या वेळी गोपाळचा मित्र परशुराम याने त्याला मारण्यासाठी दगड उचलल्यामुळे त्याने परशुरामला गोळ्या घातल्या. त्याच ठिकाणी त्याने सात गोळ्या झाडल्या. त्यानंतर तो अनिल जाधव याच्या घरी गेला. त्याला घराच्या बाहेर बोलावून थेट त्याच्यावर तीन गोळ्या झाडल्या. काही वर्षापूर्वी अनिल जाधव याने शिंदे याच्या आईला रॉडने मारहाण केल्याचा बदला त्याने घेतला. गोळाबार केल्यानंतर शिंदे त्या ठिकाणाहून पसार झाला.

दौंड शहरात गोळीबाराच्या घटनेची बातमी वाऱ्यासारखी पसरली. मारेकरी त्याच्या घरी गेला आहे, अशी चर्चा सुरू झाली. दुपारी दोनच्या सुमारास गोळीबारात मृत पावलेल्या युवकांचे मित्र, नातेवाइक व जमाव गोपाळवाडी रोड येथील आरोपीच्या घराजवळ जमा झाला. आरोपीच्या घराची दारे- खिडक्या बंद असल्याने थेट आत जाण्यात धोका होता. तो प्रशिक्षित व हत्यारबंद असल्याने आणि तो पुन्हा गोळीबार करील, याची भिती पोलिसांना होती; तसेच पोलिसांना त्या ठिकाणी जमा झालेल्या संतप्त जमावावर नियंत्रण ठेवावे लागत होते.

पुणे ग्रामीण पोलिसांसह राज्य राखीव पोलिस दलाच्या मोठ्या फौजफाट्याने शिंदे याच्या घराला वेढा घातला. बराच वेळ होऊनही काहीही हालचाल दिसून आली नाही, त्यामुळे तो घरात नसल्याचे स्पष्ट झाले. तो तेथून पसार झाला होता. शिंदे नगर रस्त्याने येण्याची शक्यता पुणे ग्रामीण पोलिस नियंत्रण कक्षाने नगर पोलिस नियंत्रण कक्षाला दिली होती. त्यांनी ही माहिती सुपा पोलिस ठाण्यास कळविली. अतिरिक्त पोलिस अधीक्षक डॉ. संदीप पखाले यांनी शिंदेला सुपा येथून अटक केल्याचे सांगितल्यानंतर जमाव पांगला.

याबाबत कोल्हापूर परिक्षेत्राचे विशेष पोलिस महानिरीक्षक विश्वास नांगरे पाटील यांनी सांगितले, की ‘संजय शिंदे हा गुन्हेगारी खुनशी व प्रवृत्तीचा आहे. त्याने आर्थिक वादातून दोघांना गोळ्या घातल्या आहेत आणि एकाला पूर्ववैमनस्यातून गोळ्या घातल्या आहे. या आरोपीला नाकाबंदी करून सुपा पोलिसांनी पकडले आहे. शिंदे याने या घटनेपूर्वी तो ज्या ठिकाणी काम करतो, त्या ठिकाणाहून एक पिस्तुल व २२ जिवंत काडतुसे घेतल्याचे समोर आले आहे. याप्रकरणी पोलिस अधिक तपास करत आहेत.

संजय शिंदे हा तिघांवर गोळीबार करून मोपेडवरून पुणे रस्त्याने नगरच्या दिशेने येत होता. सुपा पोलिसांच्या पथकाला याची माहिती मिळाल्यानंतर त्याला सायंकाळी सहाच्या सुमारास सापळा रचून पकडले. त्याच्याकडून एक पिस्तुल व बारा जिवंत काडतुसे हस्तगत करण्यात आली आहेत. सुपा पोलिस ठाण्याचे निरीक्षक राजेंद्र पाटील व त्यांच्या पथकाने टोलनाक्यापासून काही अंतरावर सापळा रचला. सायंकाळच्या सुमारास विनानंबरच्या ज्युपीटर मोपेडवरून तो नगरच्या दिशेने भरधाव वेगात येत असल्याचे दिसले. त्याच्याकडे पिस्तुल असल्याची शक्यता असल्याने थेट पकडणे धोक्याचे होते. म्हणून पोलिसांनी टोलनाका ओलांडून त्याला नगरकडे काही अंतर येऊ दिले. त्यानंतर त्याचा ‘सिनेस्टाइल’ पाठलाग सुरू केला. तो जवळ येताच पोलिसांनी त्याच्या एका बाजूने चारचाकी वाहन व दुसऱ्या बाजूने दोन मोटारसायकलींनी वेढले. इंग्रजीतील ‘व्ही’ आकाराप्रमाणे घेरून त्याला दुचाकीचा वेग कमी करण्यासाठी प्रवृत्त केले. वेग कमी होताच पाठलाग करणाऱ्या दुचाकीवर पाठीमागे बसलेल्या पोलिसाने त्याच्या दिशेने एसएलआर रायफल रोखली. त्यानंतर काही क्षणातच झडप घालून त्याला पकडले. त्याच्या अंगाची झडती घेतली असता त्याच्याकडे एक पिस्तुल व १२ जिवंत काडतुसे सापडली. दहा गोळ्या त्याने दौंड येथे फायर केल्याचे सांगितले. पोलिसांनी त्याला ताब्यात घेऊन सुपा पोलिस ठाण्यात नेले व पळून जाण्यासाठी वापरलेली मोपेडही ताब्यात घेतली.

तो एसआरपीएफमध्ये सेवेत असल्याने दौंड येथे वास्तव्यास होता. त्याचे मूळ गाव जामखेड तालुक्यातील खर्डा येथे असल्याची माहिती पोलिस सूत्रांकडून समजली.

Download Android Application