व्हीएस न्यूज - समस्त ग्रामस्थ भूगांव, पुणे जिल्हा कुस्तीगीर संघ, मुळशी तालुका कुस्तीगीर संघ व मल्लसम्राट प्रतिष्ठान यांच्यावतीने आणि महाराष्ट्र राज्य कुस्तीगीर परिषदेच्या मान्यतेने ६१ वी वरिष्ठ गट राज्य अजिंक्यपद कुस्ती स्पर्धा व महाराष्ट्र केसरी कुस्ती स्पर्धेचे आयोजन करण्यात आले आहे. मुळशी तालुक्यातील भूगाव येथे ही स्पर्धा होणार आहे. तत्पूर्वी मंगळवारी मानाच्या चांदीच्या गदेचे पूजन करण्यात आले.

कार्यक्रमाचे आयोजन राष्ट्रीय कुस्ती पंच चंद्रकांत मोहोळ आणि संग्राम मोहोळ यांनी केले होते. यावेळी शांताराम इंगवले, शिवाजी तांगडे, अनिल पवार, कैलास मोहोळ, सुरेश हरपुडे, अनिल मोहोळ, विजय मोहोळ, सुरेश मोहोळ गणेश मोहोळ, रमाकांत साळुंके, निवृत्ती चोंधे, अजिंक्य मोहोळ, विजय जाधव, संजय भामरे उपस्थित होते.

महाराष्ट्र राज्य कुस्तीगीर परिषद मान्यतेने होणारी ही स्पर्धा भूगाव येथील कुस्तीमहर्षी मामासाहेब मोहोळ क्रीडानगरीत २४ डिसेंबरपर्यंत चालणार आहे. या स्पर्धेच्या निमित्ताने नामवंत मल्लांच्या माती व गादीवरील कुस्त्या चाहत्यांना अनुभवायला मिळणार आहेत.

सर्वाधिक उत्कंठा असलेली महाराष्ट्र केसरीची लढत शनिवार दिनांक २४ डिसेंबर रोजी होईल. स्पर्धेत महाराष्ट्रातील ४५ जिल्हा व शहर तालीम संघातील तब्बल ९०० मल्ल सहभागी होणार आहेत. त्याचबरोबर ९० मार्गदर्शक आणि संघव्यवस्थापक, १२५ तांत्रिक अधिकारी व ८० पदाधिकाऱ्यांचे स्पर्धेसाठी सहकार्य मिळणार आहे. मंगळवार खेळाडूंची वजने आणि वैद्यकीय तपासणी झाली. शिवाय, अनेक संघ पुण्यात दाखल झाले. तसेच दुपारी पंच उजळणी वर्ग घेण्यात आला. यात आंतरराष्ट्रीय पंच आणि कुस्तीगीर परिषदेचे तांत्रिक अधिकारी दिनेश गुंड यांनी सर्व तांत्रिक अधिकाऱ्यांना मार्गदर्शन केले.

दुपारच्या सत्रात गादी व माती विभागातील अ गटात ५७, ७४, ७९ किलो वजनी गटातील मल्लांचे वजन आणि वैद्यकीय तपासणी झाली. स्पर्धेचे उद्घाटन क्रीडा मंत्री विनोद तावडे यांच्या हस्ते होणार आहे. या वेळी पालकमंत्री गिरीष बापट, महाराष्ट्र राज्य कुस्तीगीर संघटनेचे सरचिटणीस बाळासाहेब लांडगे, जिल्हा परिषदेचे अध्यक्ष विश्वास देवकात, पुणे जिल्हा कुस्तीगीर संघाचे अध्यक्ष संदीप भोंडवे आदी मान्यवर उपस्थित राहणार आहेत. तर रविवार, दिनांक २४ डिसेंबर रोजी स्पर्धेच्या समारोपाला महाराष्ट्र राज्य कुस्तीगीर परिषदेचे अध्यक्ष शरद पवार, मुख्यमंत्री देवेंद्र फडणवीस, नितीन गडकरी आदी उपस्थित राहणार आहेत.

२१ डिसेंबर रोजी दुपारी ४ वाजता स्पर्धेत सहभागी पैलवानांची वाजतगाजत मिरवणूक काढण्यात येणार आहे. यामध्ये प्रत्येक जिल्हा व शहर तालीम संघाचे कुस्तीपटू आपल्या जिल्हयाचे प्रतिनिधीत्व करतील. तसेच महाराष्ट्र केसरी किताबासाठी लढणारे मल्ल एकाच जीपमधून मिरवणूकीत सहभागी होणार आहेत.

महाराष्ट्र केसरीमध्ये प्रथमच महिला कुस्तीपटूंची लढत –
यंदा महाराष्ट्र केसरीमध्ये प्रथमच महिलांच्या कुस्तीला प्रोत्साहन देण्यासाठी महिलांच्या प्रातिनिधीक कुस्तीचे आयोजन करण्यात आले आहे. शनिवार दिनांक २३ डिसेंबर २०१७ रोजी महाराष्ट्राची महिला कुस्तीपटू अंकीता गुंड आणि हरीयाणाची कुस्तीपटू ममता यांच्यात लढत रंगणार आहे.

– अशी आहे गदा –
गदेची उंची साधारण २७ ते ३० इंच असून, व्यास ९ ते १० इंच इतका असतो. तिचे वजन ८ ते १० किलो असते. गदा संपूर्ण लाकडी असून, त्यावर चांदीचे नक्षीकाम केले जाते. २८ गेज चांदीचा पत्रा यासाठी वापरला जातो. या गदेवर कुस्ती महर्षी मामासाहेब मोहोळ यांचे छायाचित्र असते व कुस्तीचे दैवत असणाऱ्या हनुमानाचेही छायाचित्र असते. मागील ३४ वर्षांपासून पानगरी कुटुंबीय गदा बनविण्याचे काम करते.

व्हीएस न्यूज - पुणे महानगरपालिकेतील राष्ट्रवादी काँग्रेसचे नगरसेवक आणि स्थायी समितीचे माजी अध्यक्ष बाबुराव चांदेरे यांच्या घरावर मंगळवारी आयकर विभागाने छापा टाकला. येथील बाणेर परिसरातील वीरभद्र नगरमध्ये बाबुराव चांदेरे यांचे घर आहे. या ठिकाणी आज सकाळी साडेसहाच्या सुमारास आयकर विभागाचे पथक येऊन धडकले. सध्या हे अधिकारी चांदोरे यांच्या घरी चौकशी करत आहेत. बाबुराव चांदोरे हे राष्ट्रवादी काँग्रेसच्या ज्येष्ठ नगरसेवकांपैकी एक आहेत. ते अजित पवारांचे निकटवर्तीय मानले जातात. बाबुराव चांदोरे आतापर्यंत तीनवेळा नगरसेवक म्हणून महापालिकेवर निवडून गेले आहेत. त्यांनी कोथरूड मतदारसंघातून विधानसभेची निवडणुकही लढवली होती. मात्र, त्यांना यावेळी पराभवाचा सामना करावा लागला होता. त्यांचे अनेक व्यवसाय होते. काही दिवसांपूर्वीच मुलाच्या लग्नात कोट्यवधी रुपये खर्च केल्यामुळे ते चांगलेच चर्चेत आले होते. पुण्यात या लग्नाची चर्चा रंगली होती. या पार्श्वभूमीवर आज सकाळी साध्या वेषातील आयकर विभागाच्या अधिकाऱ्यांनी आणि पोलिसांनी चांदेरे यांच्या घरावर छापा टाकला. आयकर विभाग आणि पोलिसांचे पथक अजूनही याठिकाणी उपस्थित असून चांदेरे यांची चौकशी केला जात आहे. मात्र, या कारवाईमुळे पुण्यातील राजकीय वर्तुळात एकच खळबळ उडाली आहे.

व्हीएस न्यूज - चाकण एमआयडीसी परिसरात एका युवकाची डोक्यात दगड घालून हत्या केल्याची घटना समोर आली आहे. एमआयडीसीतील मर्सिडीज बेंझ कंपनीकडे जाणाऱ्या रस्त्यावर हा प्रकार घडला. ही घटना आज (मंगळवार) सकाळी साडेआठ वाजण्याच्या सुमारास उघडकीस आली. मृताची ओळख अद्याप पटलेली नाही. चाकण पोलीस घटनास्थळी दाखल झाले असून पुढील तपास सुरू आहे.

पोलिसांनी दिलेल्या माहितीनुसार, चाकण औद्योगिक वसाहतीतील खराबवाडी हद्दीत सारा सिटी ते मर्सिडीज बेंझ कंपनीकडे जाणाऱ्या रस्त्याच्या बाजूला ३५ वर्षीय युवकाचा छिन्नविच्छिन्न अवस्थेतील मृतदेह आढळून आला. ही हत्या कोणी व कशासाठी केली हे अद्याप समजू शकलेले नाही. डोक्यात दगड घातल्याने मृतदेहाची ओळखही पटू शकलेली नाही. मृताकडे आढळून आलेल्या ऐवजावरून चाकण पोलीस मृतदेहाची ओळख पटवण्याचा प्रयत्न करत आहेत. परंतु, अद्याप पोलिसांच्या हाती काहीच लागलेले नाही. या घटनेमुळे परिसरातील नागरिकांमध्ये भीतीचे वातावरण आहे. पोलिसांचा तपास सुरू आहे.

व्हीएस न्यूज - गुजरात आणि हिमाचल प्रदेश विधानसभा निवडणुकीत भाजपला यश मिळाले. या विजयाचा पिंपरी चिंचवड शहर भाजपच्यावतीने मोठा जल्लोष करण्यात आला. पिंपरीतील डॉ. बाबासाहेब आंबेडकर चौकात पदाधिकार्यांनी पेढे वाटून आनंद साजरा केला. यावेळी फटाक्यांची आतिषबाजीही करण्यात आली. तर महिला पदाधिकार्यांनी फुगडी खेळून विजयोत्सव साजरा केला.

यावेळी महापौर नितीन काळजे, उपमहापौर शैलजा मोरे, सत्तारूढ पक्षनेते एकनाथ पवार, माजी शहराध्यक्ष सदाशिव खाडे, महिला अध्यक्षा शैलजा मोळक, प्रदेश सदस्या उमा खापरे, सरचिटणीस प्रमोद निसळ, अमोल थोरात,नगरसेवक शत्रुघ्न काटे, तुषार कामठे, बाबू नायर, मोरेश्वर शेडगे, विलास मडिगेरी, माऊली थोरात, शैलेश मोरे, उत्तम केंदळे, नामदेव ढाके, सागर गवळी, नगरसेविका कमल घोलप तसेच कार्यकर्ते पदाधिकारी मोठ्या संख्येने उपस्थित होते.

व्हीएस न्यूज - प्राधिकरण, निगडी, यमुनानगर, साईनाथनगर या भागातील तब्बल सात हजार घरे स्वत:च्या मालकीचे असतानाही ती केवळ रेड झोनच्या हद्दीत येत असल्याने त्यांना राष्ट्रीयकृत बँका कर्ज देत नाहीत. त्यामुळे स्वत:चे घर असूनही रहिवाशांना कर्ज मिळत नसल्याने आर्थिक कुंचबणा होत आहे. त्यात प्राधिकरणही कर्जासाठी ‘ना हरकत दाखला’ देत नसल्याने रहिवाशी आर्थिक कात्रीत सापडले आहे. या नागरिकांना ना हरकत दाखले देण्याची मागणी मनसेचे शहराध्यक्ष सचिन चिखले यांनी पुणे जिल्हाधिकारी कार्यालयाकडे केली आहे.

याप्रकरणी उपजिल्हाधिकारी चंद्रकांत मोटे यांना निवेदन देण्यात आले आहे. याबाबत पत्रकार परिषदेत माहिती देताना सचिन चिखले म्हणाले, पिंपरी चिंचवड नवनगर प्राधिकरण विकास प्राधिकरणाच्या हद्दीत सदर भाग येतो. सन १९७२ मध्ये स्थापन झालेल्या प्राधिकरणाने भूखंडावर स्वत: बांधकाम करून इमारती विकल्या आहेत. प्राधिकरण स्थापन झाल्यापासून सुमारे ४५ वर्षे या परिसरामध्ये अनेक रहिवाशी राहत आहेत. त्यातील असंख्य रहिवासी हे ज्येष्ठ नागरिक आहेत. त्यांना मुले-मुलीचा विवाह, परदेशात जाणे, इतर कारणांसाठी आर्थिक रक्कमेची गरज भासते. मात्र, त्यासाठी कर्ज देण्यास राष्ट्रीयकृत बँका स्पष्ट नकार देत आहेत.

प्राधिकरण, निगडी, यमुनानगर, साईनाथनगर परिसरातील घर मालकांना ही समस्या भेडसावत आहे. त्यांची घरे ४५ वर्षे जुनी असताना सन १९९८-९९ मध्ये रेड झोन हद्दीचा प्रश्‍न समोर आला. यामध्ये संबंधित रहिवाशांचा कोणताही दोष नाही. तरीही, त्यांना बँका कर्ज नाकारत असल्याने त्यांची आर्थिक कुंचबणा होत आहे, असे चिखले यांनी सांगितले. मोटे यांनी विभागीय आयुक्त चंद्रकांत दळवी यांच्याकडे सदर प्रकरण सादर करणार असल्याची ग्वाही दिल्याचे,सचिन चिखले यांनी सांगितले.

व्हीएस न्यूज - शिवसेना प्रणित शिवव्यापारीसेना शहरप्रमुख युवराज भगवान दाखले यांनी तयार केलेल्या जानेवारी २०१८ नविन वर्षे दिनदर्शिका प्रकाशन शिवसेना नेते खासदार संजयजी राऊतसाहेब यांच्या शुभ हस्ते मुंबई या ठिकाणी करण्यात आले यावेळी राऊत साहेबांनी दिनदर्शिकेचे कौतुक करून शुभेच्छा दिल्या .

यावेळी जेष्ठ निष्टावंत शिवसैनिक किशोर पाटील , शिवसेना प्रणित शिवव्यापारीसेना शहर प्रमुख युवराज दाखले , उपशहरप्रमुख गणेश आहेर ,चिंचवड विधानसभा प्रमुख निलेश भोरे, उपविधानसभा प्रमुख राज श्रीमंत गिरी ,शिवसैनिक रोहीदास तांबे आदी उपस्थित होते .